香港中學畢業生如果唔入本地大學，要到外國嘅話，當然首選美英，然後係加拿大澳洲，英國大學普遍鬧窮，要收錄國際學生幫補全年經費

香港中學畢業生如果唔入本地大學，要到外國嘅話，當然首選美英，然後係加拿大澳洲，英國大學普遍鬧窮，要收錄國際學生幫補全年經費，故此除咗牛劍UCL Imperial LSE等知名學府之外，其實申請其他大學入學，仲易過入中大港大科大，DSE成績中等嘅，不妨一試。至於入大陸，北大清華復旦等頂尖名校，為咗「開放政策」，對港台澳學生可能寬鬆少少。到台灣，左丁山讀書年代，大陸一級學者渡海而來，水準甚高，現21世紀今天，唔敢講嘞，剩係睇台灣大學「拔管事件」（即政府強行不准與馬英九有聯繫嘅經濟學家管中閔出任台大校長事件，雖則管中閔獲得台大校長遴選委員會一致通過獲任），就已經夠嚇人。管中閔最近去美國訪問，概而歎之「以前我知道台大與香港中大齊名，曾經領先，但現在已追不上中大。」台大的老校友怕聽完都傷心。今年台灣大學學位過剩，7月19日「大學入學指定科目考試」（大學招考）放榜，考生五萬多人，六科分數以100分為滿分，今年考到原始總分38分就可以申請入校。


香港人好鍾意去日本旅行，留學日本又點？日本專家／日本文化協會事務局局長馬鐵穎對左丁山講，日本有一個EJU考試，每年兩次，可以在香港考試，成績得到日本400幾間院校承認，包括慶應、早稻田。考一個試就可以報讀400幾間日本大學，可謂慳水慳力，而家好多日本大學，尤其是工科，都有英文教學，唔需要識日文，入咗去先至讀日文囉。有問題可以向香港日本文化協會查詢。
著名經濟學家練乙錚教授現在喺富士山腳嘅山梨大學學院大學教書，佢回港出席書展，參加講座，後來又提供不少留學日本資訊，講明個別大學嘅國際學院（以英語為教學語言）可以接受香港DSE畢業生申請，即使DSE考中文不符合本地大學要求，都可以申請到日本讀大學，佢地只睇英文唔理中文嘅，所以如果考DSE理科成績好，偏偏中文飲恨嘅話，大可申請日本私立大學，學費一年大約係240萬日圓（全包），留學簽證學生可每天兼職最多8小時，時薪由最少700日圓（食店）至1500日圓（繙譯）不等